O Centro de Interpretación dos Parques Naturais de Galicia, situarase, como xa avanzara o conselleiro de Medio Ambiente e Desenvolvemento Sostible, Manuel Vázquez Fernández, na cidade de Ourense. O titular do departamento autonómico deu hoxe, na cidade das Burgas, un novo paso, este xa definitivo, no obxectivo de converter a Ourense no centro neurálxico da natureza en Galicia, contando como testemuñas cun amplo abano dos representantes empresariais, económicos, sociais, culturais, sindicais, universitarios e medio ambientais da cidade. O acto serviu para descubrir o anteproxecto do Centro de Interpretación dos Parques Naturais galegos que, tal e como explicou  Manuel Vázquez, non podía ter outro emprazamento mais que o elixido pola propia consellería: Ourense.

Así, o conselleiro salientou que Ourense é a provincia galega cun maior número de parques naturais, exactamente a metade dos que ten a comunidade (Invernadoiro, Xures e Lastra). Pero ademais, na proposta de ampliación deste espacio, que elabora a propia consellería Ourense, figura con outros dous novos parques, que serán os de Pena Trevinca e o Macizo

Central. Pero non é o inmenso patrimonio medioambiental ourensán o único argumento para o seu emprazamento nesta cidade. O centro será o pórtico de entrada á Galicia verde, ben a través da actual autovía Rías Baixas ou  da futura estación do AVE. Ourense amosará ao mundo, dende a súa posición estratéxica, o mellor e mais valioso valor de todo este país: a súa incomparable riqueza e variedade natural.

O Centro de Interpretación dos Parques Naturais de Galicia será un símbolo da Galicia verde, o único deste tipo en todo o país, un compendio de todos os seus ecosistemas; pero tamén o será en si mesmo: pola súa singularidade arquitectónica e porque será o primeiro edificio desta magnitude cen por cen sostible (incorpora criterios de eficiencia enerxética, de consumo de auga, de emprego de materiais e incluso quedará prevista a súa demolición a futuro para que os seus elementos podan ser reciclados ou reempregados totalmente). Así se recolle xa no anteproxecto que a empresa Tragsatec elaborou para a Consellería de Medio Ambiente e Desenvolvemento Sostible, que agora está elaborando xa o prego de condicións para licitar o proxecto e a construcción do inmoble, que sairá a concurso antes do verán. As obras deberán comezar a finais deste ano ou principios do 2008 e estarán rematadas no prime

Consellería de Medio Ambiente, Territorio e Infraestruturas Gabinete de Comunicación prensa.cma@xunta.es