O clima defínese coma a síntese das condicións meteorolóxicas dunha zona xeográfica durante un período de tempo dado. Aínda que a meteoroloxía varía continuamente, o clima é independente dos estados meteorolóxicos illados e, nun lugar determinado, permanece practicamente constante durante longos períodos de tempo.

En síntese, o clima está gobernado pola radiación de onda curta procedente do Sol. A Terra recibe unha cantidade de radiación solar, parte da cal (un terzo, aproximadamente), é reflectida cara ao exterior pola propia superficie terrestre ou pola atmosfera. A radiación restante é capturada pola superficie terrestre e polos compoñentes atmosféricos. A radiación solar de onda curta non é absorbida polos principais gases que forman parte da atmosfera. Non obstante, a radiación de onda longa emitida pola superficie terrestre é absorbida e posteriormente emitida por estes, quentando as capas baixas da atmosfera. Ao aumentar a concentración atmosférica de gases de efecto invernadoiro (GEI)1, prodúcese unha maior absorción de radiación infravermella, que volve ser emitida á Terra co conseguinte aumento das temperaturas sobre a superficie. Este fenómeno denomínase Efecto Invernadoiro, proceso causado polos GEI, é responsable do fenómeno do Cambio Climático.

O fenómeno do cambio climático é un dos maiores retos ambientais a que se enfronta na actualidade a nosa sociedade debido ás súas implicacións sociais, económicas e ambientais. Este reto é importante, non soamente pola intensidade dos impactos prognosticados en diferentes estudos, senón tamén pola extensión do fenómeno a escala planetaria, así como polas implicacións que previsiblemente terá nos modos de vida e métodos de produción.