Resolución do 24 de febreiro de 2003, de delegación de funcións e atribucións do presidente de Augas de Galicia no director xeral de Augas de Galicia e nos titulares das unidades administrativas de Augas de Galicia referidas no artigo 39 do Decreto 108/1996, do 29 de febreiro, polo que se aproba o Regulamento do organismo autónomo Augas de Galicia (DOG Nº46,  6/03/2003).

O Decreto 108/1996, do 29 de febreiro, polo que se aproba o Regulamento do organismo autónomo Augas de Galicia, na redacción dada polo Decreto 146/2003, do 6 de febreiro, que o modifica, establece, no seu artigo 7º, que son órganos de goberno de Augas de Galicia o presidente do organismo, o director xeral e a xunta de goberno.

O artigo 13º do devandito decreto enumera, no seu punto 1, as atribucións conferidas ó presidente de Augas de Galicia, determinando, no punto 2, que as funcións e atribucións citadas, coa excepción da referida na letra h), poderán ser delegadas, parcialmente ou na súa totalidade, no director xeral de Augas de Galicia ou nun ou en varios titulares das unidades administrativas citadas, como órganos de administración de Augas de Galicia, nos artigos 9º e 39º do citado texto regulamentario. Así mesmo, o punto 3 do citado artigo 13º configura o director xeral como órgano de apoio ó presidente, establecendo que dito órgano de goberno, ademais das funcións inherentes á condición descrita, exercerá todas aquelos que lle sexan expresamente delegadas polo presidente.

Nesta orde de cousas, a concentración de funcións no presidente enmarcada no inxente volume de actividades desenvolvidas polo organismo autónomo, xunto á introducción da figura do director xeral, como órgano de goberno creado para prestar apoio técnico-administrativo ó presidente, aconsellan recorrer á delegación de funcións e atribucións naquel, para consegui-la a necesaria axilización administrativa que permita desenvolver axeitadamente os principios informadores da actividade administrativa, recollidos no artigo 103.1º da Constitución española.

Na súa virtude, facendo uso das facultades conferidas polo artigo 13.2º e 3º do Decreto 108/1996, do 29 de febreiro, polo que se aproba o Regulamento do organismo autónomo Augas de Galicia, e de conformidade co disposto no artigo 13º da Lei 30/1992, do 26 de novembro, de réxime xurídico das administracións públicas e do procedemento administrativo común e demais disposicións de xeral aplicación,

RESOLVO:
Primeiro.-Delegar no director xeral de Augas de Galicia, na súa totalidade, as atribucións conferidas ó presidente de Augas de Galicia no artigo 13.1º letras c), d), f), g), i) e j) do Decreto 108/1996, do 29 de febreiro, polo que se aproba o Regulamento do organismo autónomo Augas de Galicia.

Segundo.-Delegar nos titulares da Subdirección Xeral de Programación e Proxectos e da Subdirección Xeral de Xestión do Dominio Público Hidráulico, na súa totalidade e en relación coa súa respectiva esfera competencial, a atribución conferida ó presidente de Augas de Galicia no artigo 13.1º, letra e) do Decreto 108/1996, do 29 de febreiro, polo que se aproba o Regulamento do organismo autónomo Augas de Galicia. Para os restantes expedientes tramitados polo organismo, delégase no director xeral de Augas de Galicia, na súa totalidade, a referida atribución conferida ó presidente de Augas de Galicia no artigo 13.1º, letra e) do Decreto 108/1996, do 29 de febreiro.

Terceiro.-Delegar no titular da secretaría xeral o exercicio do seguinte cometido:

a) Ordena-lo envío a tribunais e xulgados dos expedientes administrativos relativos a resolucións e actos dictados polo organismo autónomo no seu ámbito competencial, cando así o requira a lexislación procesual que resulte de aplicación en cada caso.

Cuarto.-As resolucións e actos administrativos que se adopten facendo uso das delegacións contidas nesta resolución indicarán expresamente esta circunstancia e consideraranse dictadas polo órgano delegante.

Quinto.-En calquera momento, o presidente de Augas de Galicia poderá reclama-lo exercicio das atribucións que son delegadas por esta resolución, das que quedan excluídos, en todo caso, os supostos previstos no artigo 13.2º da Lei 30/1992, do 26 de novembro, de réxime xurídico das administracións públicas e do procedemento administrativo común, e no artigo 42.2º da Lei 1/1983, do 22 de febreiro, reguladora da Xunta e do seu presidente.

Santiago de Compostela, 24 de febreiro de 2003.
Justo de Benito Basanta
Presidente do organismo autónomo Augas
de Galicia