O pole

     A reproducción por esporas é característica do mundo vexetal, constituíndo para algúns grupos o único modo de propagación. Algúns vexetais forman dous tipos de esporas, as megasporas que dan orixe a plantas productoras de gametos femininos e as microsporas, das que se orixina a planta que forma os gametos masculinos.

     Dentro das plantas con sementes o gran de pole é a microspora, que orixina o gametofito masculino, formado por unha ou unhas poucas células. Este paso de microspora a gametofito ten lugar no interior do gran de pole e non supón ningunha modificación no aspecto deste, polo que non se pode observar a simple vista. As plantas terrestres protexen a súa microspora da deshidratación mediante a membrana celular, común a tódalas células vexetais, e unha parede interna extremadamente resistente.

     Para cumprir co seu cometido, o gran de pole debe chegar dende a súa orixe nos estambres da flor ata o seu destino no ovario, onde está o gameto feminino. Durante este traxecto pode axudarse de insectos, tanto de forma voluntaria como involuntaria, podendo atoparse tanto no aire como no solo.

     O pole de cada especie ten as súas características definitorias como forma, cor, simetría, polaridade, estructura, escultura e aperturas da sua parede externa. Estas características permiten recoñecer os distintos xéneros e especies de plantas.

Aplicacións

     A principal aplicación dos resultados obtidos é de carácter clínico, debido á alta porcentaxe de poboación que se ve afectada polo pole. Os poles son os segundos causantes de alerxias que afectan ó aparato respiratorio, tan so superados polos ácaros. Por especies, a máis representativa neste aspecto son as gramíneas, seguidas polas estrugas, plantago, abedul, castiñeiro, carballo e abeleira. A polinización destas especies é a causante da rinitis alérxica que afecta a un 10% da poboación. Estas cifras son aínda máis relevantes se se ten en conta que o 80% dos problemas de asma teñen a súa orixe en alerxias.

     O reconto da concentración de pole na atmósfera permite ós alergólogos coñecer o pole que máis repercute sobre os pacientes, o que constitúe unha gran axuda á hora de buscar vacunas.

     Estudios epidemolóxicos prevén que no año 2015 a mitade da poboación das cidades dos países máis industrializados sufrirán algún tipo de alerxia. Esta evolución é unha consecuencia da sociedade do benestar, na que se observa un aumento progresivo deste tipo de patoloxías.

     Tamén pode utilizarse o estudio da polinización para a predicción de colleitas, complementando para este fin ós factores de crecemiento e meteoroloxía..